السلام عليكم.. أنا بنت عندي 22 سنة لسه متخرجة من كلية من كليات القمة تقدم لخطبتي شاب اكبر مني ب 3 سنوات متخرج من نفس الكلية بتاعتي.
تعرف عليّ عندما كنت في الكلية وشافني فسأل احته علي (اخته زميلي في نفس سنتي الدراسية) وبعت اخته علطول تكلمني في انه عاوز يخطبني
الحقيقة اول ما شوفته ما شدنيش خالص وحسيت انه ممكن يكون في فرص احسن لي خاصة انه والدي مسافر في بلد عربية ومش هايجي غير بعد مدة فاتحججت بالحجة دي وقلت لاخته انه اني ما اقدرش اتعرف عليه الا اما والدي يجي. .
المهم هو كلمني بنفسه وعرفني بنفسه وانه نيته خير وانه حاسس اني انسانة مناسبة ليه جدا ودي اللي بيدور عليها. . وبصراحة لما كلمني حسيت بصدقه واقنعني بقبول التعرف عليه طبعا بمعرفة ماما وبابا عشان لو حصل توافق يكون في خطوبة. .
لما اتعرفت عليه (كلام في التليفون ونت) وكمان سؤال عنه بعض الناس اللي اتعامل معاهم واصحابي اللي هما اصحاب اخته اللي عارفينه عن قرب شوية علي ضوء المعلومات اللي وصلتني واحساسي الشخصي لقيت انه عنده المميزات دي:
صيور - أمين - صادق - واضح وصريح - نشيط - ذكي - متفاهم(يناقش) - أصيل (بار بأهله جداا ودي اتأكدت منها جداا) متحمل للمسئولية - محبوب بين الناس - تفكيره عميق وقادر علي الاقناع جداا بدليل انه حول رغبتي من التخلص منه بالرغبة في التعرف عليه وطلعت لنه كل المميزات اللي انا شايفاها دي
بالنسبة للعيوب اللي توصلتله هيا معظمها مش عيوب فيه ولكنها عيوب تخص الموضوع بشكل عام: والده صعب وديكتاتور بشهادته (اخاف انه يكون زيه عشان العرق دساس) - أنا من المدينة وسأسكن في قرية واولادي كده هايعيشوا طول عمرهم في القرية
- هو شخص اجتماعي جداا ومتعود يدخل اصحابه البيت واحنا عيله بطيعتها انطوائية ومش متعودين انه حد غريب يدخل البيت - احتمال جداا تدخل اهله في حياتنا لاني هاسكن معاهم في نفس البيت (لكننا اتفقنا اني اكون مستقلة في شقتي واساعد مامته ولكن دون اجبار يعني مش مفروض عليا حاجة)
- اخر حاجة انه قروي وعيلته قروية الحقيقة انه النقطة الاخيرة دي مؤثرة عليا بشكل كبير ومخوفاني جداااااخاصة اني اتربيت طول عمري في المدينة واهلي كمان. . وعمتي الوحيدة اللي تزوجت في قرية بحس انه عيلتي بتنظر لاولادها انهم اقل شوية. .
بصراحة لو في اي وقت اي حد قال علي اولادي كلمة "فلاحين" دي انا مش عارفة هايحصلي ايه. . أنا طول عمري بحس انه دي عنصرية وانه حرام اننا نحكم علي الناس من شكلهم او لبسهم او لهجتهم. . لكن وقت الجد ولما اتحطيت في الموقف دا بقيت انا كمان عنصرية. . .
هو غلط تفكيري دا انا مش عارفة اعمل ايه موضوع القرية دا عامل لي حاجز منه هو شخصيااتقابلت معاه مرة انا ووالدتي ووالدته في مكان عام للتعارف ولما قعدت معاه حسيت بالاطمئنان وكمان والدتي قالتلي انه وامه ناس طيبين. .
بس انا حسيت بالاطمئنان دا وقت ما انا معاه ولمدة يوم. . بعدها رجعت اقلق تاني. . طيب هو فكرة اني ارفض شخص عشان مش عاوزة اعيش في قرية دي غلط
ولا صح؟ انا خايفة ارفضه عشان كده فاكون ضيعت شخص محترم وبيحبني افيدوني بالله عليكم
السلام عليكم ورحمة الله وبركاته.
الأخت الفاضلة:
جميل جدا أن تتوافقي مع إنسان في الطباع والأجمل أن تجدي من ضمن صفاته أنه صبور وأمين وذكي ونشيط كما ذكرت وأهم صفاته على الإطلاق بما أنه صبور أن لدية القدرة على النقاش والإقناع وهي ميزة يفتقر إليها الكثير من الرجال.
وبدليل أنه أقنعك بأن تتعرفي علية عن قرب وبكل احترام وأدب وتقرب منك ومن والدتك إلى حين وصول والدك لإتمام الخطوبة بإذن الله.
مخاوفك في محلها طبعا. . ولكن الجميل أيضا في "عيوب " الشخص المتقدم لك أن عيوبه لا تمسه كإنسان ولكنها تعتبر عيوب في والدة أو في محيطة.
وبالتالي عليك أن تحاولي معه بكل أدب ولياقة ولباقة أن تتناقشي معه بكل صراحة في مخاوفك وإن كان هناك فرصة متاحة للإقامة بالمدينة أم لا. . وهذا أفضل تجنبا لأي احتكاك مستقبلي مع أهله وخاصة والده.
أما إن كان مضطر لذلك فضعي قواعد وخطوط عريضة للأمر: مثلا وضحي من البداية أن مساعدتك لوالدته أمر اختياري- - وضحي أن دخول أصدقائه البيت أمر غير مستحب فيما بعد لأن البيت سيكون به فيما بعد زوجة وأولاد وبالتالي سيكون له خصوصية.
وأخيرا أريد أن أقول لك إنه لم يعد هناك كلمة قرية ومدينة - - فمصر الآن والعالم كله أصبح قرية كبيرة - - وبعض القرى أصبحت أقرب إلى المدن.
لا تقلقي وكما ذكرت لك تقربي منه وصارحيه بمخاوفك - - أقدمي على الخطوبة وتريثي بعدها لفترة وراقبي الأمر عن قرب قبل إتمام الزواج بأذن الله وربنا يكتب لك كل الخير بأذن الرحمن.
وبالله التوفيق.
الكاتب: أ. رانيا محمد حفني
المصدر: موقع المستشار
